கவனி..

எதிர்பாராக் கணமொன்றில்

கதவு மூடும் 

எவ்வளவு தான் முயன்றும்

இனித் திறக்க வாய்ப்பில்லை 

வெளிப்பூட்டு, கனத்த கதவு 

கவனம் முழுதும் 

கதவிலேயே இருந்தது 

உதைந்தும், தோளால் இடித்தும் 

ஓர் அசைவும் இல்லை 

வெளிவர இனி வாய்ப்பற்று 

வழி மூடிப் போனதாய் 

வாடிப் போனாய்

கதவையே பார்த்துக் கொண்டிருந்தால் 

காலம் தான் ஓடும்

கைக்கெட்டும் தூரத்தில் 

சன்னலும் உண்டு கவனித்தாயா 

எழுந்து திற 

சில்லென முகத்தில் காற்றடிக்கும் 

வெளிவர இதுவும் வழிதான் 

இதையும் கூட அடித்து மூடலாம் 

கதவும், சன்னலும் அடைத்தாலென்ன 

கண்ணைத் திருப்பு, கவனி 

இருக்கிறது 

இன்னும் நிறைய வழிகள்