குப்பி விளக்கே இருந்த போதிலும்
கொட்டிக் கிடந்த மகிழ்ச்சி முகத்தினில்
அப்பிக்கிடந்த காலம் போனதா
அந்தக் காலம் கனவா, மீளுமா..
கொட்டும் மழையிலும், குண்டு மழையிலும்
தெப்பமாய் நனைந்தும் வீரர் வாழ்கையில்
மனசில் வழிந்த சுதந்திரம் இன்று
சொட்டுமில்லையே, என்னதான் ஆனது..?
உலகின் நீண்ட பிண அறையாக
ஓலமாய் வழிந்த கடற்கரை மீதில்
ஒருபேர் இனத்தின் விடுதலைக் கனவில்
உலகே சேர்ந்து திராவகம் ஊற்றினீர்
அண்ணன் வரைந்த மாதிரி நாட்டை
அனைவரும் சேர்ந்து கட்டுவோமென்னும்
எண்ணம் புள்ளியில் சேர்ந்திடும் ஓர்நாள்,
எவர் தடுத்தாலும் தமிழர் தேசம்
எதையும் தாண்டி மலர்ந்திடுமென்பது
என்றோ விதிக்கப்பட்டது
அறிக..
