தமிழரின் தலைப்பயணி..

புலிக்கொடி பறந்திடப் போர்மறன் வருகையில்

சினத்திறல் கனல் விழி செருமுகம் நோக்கி 

மலைப்பெரும் புயத்தினன் மறவர்கள் தலைவனாய்

நிலத்திடை நடந்திடும் நெடுந்தகை தானே

—

பகைப்புலம் புகுந்திடும் பாய்புலி போலவே

மிகைப்படை கடந்திடும் மேதகு வீரனாய்

தகைப்பெரும் படைக்கலத் தளபதி ஆகியே

நகைத்திடும் பகைவரை நலிவுறச் செய்தனன்

—

கற்றவை கசடற கருத்தினில் கொண்டு

பெற்றவை பிறர்க்களித் தருளும் பெருந்தகை

சொற்றவை துளியிடை பிறழா தவனே

முற்றவும் முறைமையில் முடிவுகள் காண்பவன்

—

நெறிவழி நிலைநின்று நீதியை போற்றி

குறிகொளும் குணமிகு கொள்கையின் ஊற்றம்

வெறியுறு போரினும் விதிமுறை தவறா

அறிவொடு செயல்புரி ஆற்றலின் மிக்கவன்

—

மறைந்துறை போரில் மதிநுட்பம் காட்டி

சிறந்திடு புலியின் செயல்முறை கொண்டு

திறம்பல காட்டி திசைதிசை தோறும்

மறம்புரி வீரர் மனங்குளிர் வித்தான்

—

மூளைவல் லோனாய் முனைமுகம் நோக்கி

ஆளுமை மிக்க அறிவொடு நின்று

தேர்ந்தெடு போரில் திறமுடன் வென்று

சான்றோர் போற்றும் தகைமையன் ஆனான்

—

எண்ணிய எண்ணம் இயற்றலில் வல்லோன்

மண்ணின் மீதே மாற்றார் நடுங்கிட

கண்ணில் கனலும் கடுந்திறல் மிக்கவன்

விண்ணை முட்டும் வெற்றிகள் கொண்டவன்

—

வருவன உணர்ந்து வழிகாட்டும் ஞானி

பொருவரும் திட்டம் புரிவோன் - தெருவெலாம்

மக்கள் மனதினிலே மாமணி யாகவே

மிக்க புகழொடு மேல்

—

தமிழுக்காய் வாழ்ந்த தனித்தகு செம்மல்

அமிழ்தினும் இனிய அருந்தமிழ் காத்து

நிமிர்ந்தெழு தோற்றம் நினைவிடை கொண்டு

சமர்க்களம் புகுந்து சாவினை வென்றான்..